Hefur einhver horft á Futsal? Ég ætla að leyfa mér að slá því fram að Futsal sé leiðinlegasta útgáfa knattspyrnu sem hægt er að spila. Of margar reglur, of lítið mörk og alltof mikið um stopp í leiknum. Futsal er á margan hátt eins og amerískur fótbolti. Stopp, mikill hraði, stopp, mikill hraði, stopp. Ég fyrir mitt leyti segi það að ég sakna íslensks innanhúsfótbolta eins og hann var spilaður hér áður en þetta skrípi íþróttarinnar dúkkaði upp.

Óskaplega mörgum finnst þessi parketbolti hundleiðinlegur en því er ég algerlega ósammála. Reykjavíkurmótið sem spilað var innanhús milli jóla og nýárs fannst mér til dæmis óskaplega skemmtilegt og Íslandsmótið innanhús með úrslitakeppni í Laugardalshöll eða í Austurbergi var gríðarlega spennandi og með flottri umgjörð.

Á parketinu sáust líka oft virkilega skemmtileg tilþrif og þeir sem virkilega kunnu að fara með boltann fengu að njóta sín sem aldrei fyrr. Þá reyndi meira á markmenn en nokkru sinni. Fyrir vikið voru leikirnir hraðir, tilþrifamiklir og sviptingasamir. En er það ekki svo í Futsal? Svarið við því er einfaldlega nei. Þessi líflausa, skopplausa tuðra sem menn sparka sín á milli nær aldrei karakter íþróttarinnar. Litlu mörkin eru óþolandi og eins og fyrr sagði – of mörg stopp.

Ég minnist þess að Sýn eða Rúv sýndi eitt sinn frá úrslitakeppni Íslandsmótsins í innanhúsfótbolta. Mér þótti það sjónvarpsefni virkilega skemmtilegt. Þetta var árið 1994 og Guðjón Þórðarson stýrði KR í fyrsta sinn á móti. Lýsendum mótsins þótti afskaplega gaman að sjá Guðjón byrsta sig og þá ekki síður hvernig dómararnir heyktust við að gefa honum kortið.

Ég veit ekki hvort lesendur KRreykjavik.is séu sammála mér um skemmtanagildi hins íslenska parketfótbolta en mikið væri samt gaman ef fleiri deildu þessu með mér og þá ekki síður að ef nægur fjöldi næst að hægt verði að

1)      Skora á KSÍ að endurvekja þessa útgáfu fótboltans.

2)      Skora á sjónvarpsstöðvarnar að sýna frá þessu leikjum.

Við lifum á tímum þar sem við á margan hátt höfum farið fram úr okkur sjálfum en mér finnst tíðarandi vera að breytast og fólk líta til þess sem sameinaði okkur í fortíðinni. Ég veit ekki hvort parketfótboltinn sé eitt þessara atriða en mikið langar mig að horfa á fótbolta í Laugardalshöll, drekkandi kaldan Svala og borða grillsamloku. Þetta langar mig alla daga frekar en horfa á Futsal, étandi sushi og ölkelduvatn – það er svo viðbjóðslega 2007 útlenskt.

Orðið parketfótbolti er annað orð yfir íslenskan fótbolta - hann má líka leika á dúki eins og er uppi í Austurbergi EN… skemmtilegur er leikurinn þó í Laugardalshöll