Leik KR og Víkinga í annarri umferð Reykjavíkurmótsins lyktaði með 3-3 jafntefli. Leikurinn var nokkuð fjörlegur en á tímabili var útlitið ansi svart fyrir okkar menn. En góð barátta skilaði að lokum stigi og það er margt jákvætt sem má taka út úr þessum leik.

Logi gerði tvær breytingu á liðinu frá því í leiknum gegn ÍR. Björgólfur leysti Ingólf af hólmi í sókninni og þá kom Bjarni inn í stað Dofra.

Liðið var skipað eftirtöldum. Þórður Ingason stóð í markinu í sínum fyrsta leik. Öftustu fjórir voru Skúli, Grétar, Mark og Diogo. Bjarni og Baldur voru á miðri miðjunni og þeir Óskar og Gunnar Örn á kantinum. Í fremstu víglínu voru svo Björgólfur og Gunnar Kristjáns.

Leikurinn fór ágætlega af stað en það voru víkingar sem skoruðu fyrsta mark leiksins. Bjarni átti þá vonda sendingu til baka sem Helgi Sigurðsson komst inn í. Helgi lét vaða á markið af 20 metrum og hafði boltinn viðkomu í Grétari áður en hann sveif yfir Þórð í markinu sem kom engum vörnum við.

Við þetta pressuðum við töluvert á Víkingana. Gunnar Kristjánsson slapp einn inn fyrir vörn Víkinga en markvörður þeirra varði laust skot hans. Gunnar hefði mátt gera betur en Egill Atlason er lék í miðverðinum hjá Víkingum náði nokkuð að trufla hann og gera honum erfitt fyrir.

Annað mark leiksins var einnig Víkinga. Helgi Sigurðsson hafði þá betur við Diogo út við endalínu og sendi boltann fyrir markið þar sem Daníel Hjaltason kom á ferðinni og setti boltann örugglega í netið af stuttu færi. Diogo hefði mátt  gera betur í baráttunni við Helga og þá verður að setja spurningamerki við dekkninguna í vörninni sem var helst til döpur.

Staðan var 2-0 í hálfleik. Fyrri hálfleikur var ekki fjörugur en Víkingar voru þó ekki sterkari aðilinn þrátt fyrir að staðan hafi gefið annað í skyn.

KR liðið var mun betra í síðari hálfleik og tók fljótlega öll völd á vellinum. Gunnar Kristjáns minnkaði muninn með góðu skoti úr teignum. Hann fékk boltann utarlega í teignum hægra meginn. Hann hefði getað rennt honum fyrir markið en kaus þess í stað að snúa boltann upp í fjærhornið.

Víkingar ætluðu sér greinilega að verja naumt forskot og duttu aftarlega á völlinn og freystuðu þess að beita skyndisóknum. Upp úr einni slíkri slapp sóknarmaður þeirra inn fyrir. Þórður hljóp út úr teignum og braut klaufalega á sóknarmanni þeirra. Honum var réttilega vikið af leikvelli og við því einum færri síðasta hálftíma leiksins. Í hans stað kom Einar Andri Einarsson og kusu þeir Logi og Pétur að fórna Björgólfi.

En við efldumst við mótlætið og ef eitthvað var urðum við betri.

Jöfnunarmarkið kom skömmu síðar. Gunnar Örn átti fallega sendingu á fjærstöngina þar sem Baldur skallaði hann fyrir markið, fyrir fætur Gunnar Kristjánssonar sem skoraði af stuttu færi. Virkilega vel útfærð sókn í alla staði.

En þrátt fyrir þunga pressu okkar þá voru það Víkingar er skoruðu næsta mark. Þeir komust aftur fyrir Mark og sendu hann fyrir markið þar sem sókmaður þeirra átti ekki í vandræðum með að setja hann í netið af stuttu færi.

Þegar komið var fram á lokamínútu leiksins og allt útlit fyrir sigur Víkinganna kom síðasta mark leiksins og voru það okkar menn að verki. Óskar Örn prjónaði sig í gegnum vörn Víkinga og sendi boltann beint á pönnuna á Baldri sem skallaði boltann glæsilega upp í fjærhornið.

Leiknum lauk því með 3-3 jafntefli og verða það að teljast sanngjörn úrslit þegar á heildina er litið.

Það jákvæða við leikinn er að menn gáfust ekki upp og komu til baka þegar útlitið var orðið svart. Sóknarlega séð, sérstaklega í síðari hálfleik, var liðið að leika ágætlega. Mörkin komu eftir vel útfærðar sóknir þar sem boltinn hafði gengið vel á milli manna.

Hins vegar er ýmislegt sem má bæta í leik liðsins. Þeir Mark og Diogo eru langt á eftir öðrum mönnum í leikformi. Þá sérstaklega Mark sem hefur ekki átt góða leiki gegn ÍR og Víkingi. Hann þarf að bæta sinn leik. Grétar var hins vegar öflugur og barðist á við tvo. Þá hefði ég viljað sjá Dofra halda stöðu sinni í hægri bakverðinum enda hefur hann leikið vel á undirbúningstímabilinu. Skúla Jón myndi ég vilja sjá við hlið Grétars í miðverðinum.

KR - Víkingur: 0-1 (11.), 0-2 (21.), 1-2 Gunnar Kristjánsson (52.), 2-2 Gunnar Kristjánsson (70.), 2-3 (84.), 3-3 Baldur Sigurðsson (88.)

Lið KR: Þórður Ingason - Skúli Jón Friðgeirsson, Grétar Sigfinnur Sigurðarson (f.), Mark Rutgers, Jordao Diogo (Ingólfur Sigurðsson 66.) - Gunnar Örn Jónsson (Davíð Birgisson 77.), Bjarni Guðjónsson, Baldur Sigurðsson, Óskar Örn Hauksson - Gunnar Kristjánsson, Björgólfur Takefusa (Einar Andri Einarsson 57.).

Varamenn:, Aron Bjarki Jósepsson, Egill Jónsson.

Brottvísun: Þórður Ingason (rautt) á 57. mínútu.

-

Páll Kristjánsson